宝玉道：“亲眷格搭阿有几个小姐？住勒啥场化？房子阿大格介？”阿金道：“俚笃住格场化就是原底子隔壁呀，倒有六楼六底房子笃。七月里搬进去格，原本是两家合租，故歇一家为仔生意勿好，出码头到杭州去哉，单剩倪亲眷住勒海。只有一个小姐，名字叫胡秀林，生意虽则呒啥，究竟房子嫌大，开销也嫌大，格落等到下节，就要调头搬出去格。格注房子如果奶奶住，倒真真出色呀。”宝玉道：“好是最好也呒不，可惜要等两个月，奴哪哼等得及嗄？”阿金道：“只要奶奶勿嫌合住，让我搭俚去说，包月里就搬进去阿好？”宝玉道：“能够实梗也呒啥。两家轧得和格，就一淘住下去。如果开年调头，俚笃要搬格，奴就一干子租仔。搭俚说说明白，奴打算过一礼拜要进屋格。办舒齐仔，奴总重重能格谢末哉。”阿金道：“格套小事体，说啥格谢介？只要奶奶挑挑我，赏我吃碗饭，我已经快活煞哉！”宝玉道：“肯帮奴，顶好顶好。不过进仔新屋，叫奴‘奶奶’，仍旧叫奴‘先生’，省得提起前头格事体，弄得难为情煞格。”阿金点头答应。见天光将晚，即辞了宝玉回去。宝玉托他办理，谅能成功，除去了一桩心事，专候他来回覆。当晚吃过了饭，便同阿珠到新开的咏霓戏园里看了一本戏，以消半年的积闷，不须细表。
相关影视:郭晶晶用红包做灯笼
